Maður sem er sakaður um að hafa lagt á ráðin um að ræna og myrða bresku sjónvarpskonuna Holly Willoughby hefur verið ákærður.

Maðurinn heitir Gavin Plumb. Hann er 36 ára gamall og er frá bænum Harlow sem er skammt norður af London.

Plumb hefur verið ákærður fyrir að falast eftir einstaklingi til að fremja morð fyrir sig, fyrirætlanir um að fremja nauðgun og fyrirætlanir um að fremja mannrán.

Hinn grunaði situr nú í gæsluvarðhaldi og verður leiddur fyrir dómara í dag en Plumb var handtekinn 4. október síðastliðinn.

Einn af yfirmönnum lögreglunnar á svæðinu segir að rannsóknin hafi gengið afar hratt fyrir sig og að lögreglumenn embættisins sem og starfssytkini þeirra hjá öðrum lögregluembættum hefðu unnið langa vinnudaga til að tryggja það að hægt væri að ákæra Plumb sem allra fyrst.

Hann segir það skipta öllu máli að gæta öryggis þolenda og það verði í þessu máli sem og öðrum sett í forgang.

Holly Willoughby er landsþekkt í Bretlandi en hún hefur verið meðal stjórnenda morgunþáttarins This Morning á sjónvarpsstöðinni ITV undanfarin ár. Framleiðendum þáttarins var tilkynnt í gærmorgun um fyrirætlanir Plumb og Willoughby tók í kjölfarið þá ákvörðun, skömmu áður en útsending átti að hefjast, að vera ekki með í þætti dagsins en þátturinn er yfirleitt sýndur í beinni útsendingu.

ITV hefur ráðið öryggisverði til að gæta öryggis hennar allan sólarhringinn og munu þessir öryggisverðir eiga í samstarfi við lögregluna.

Talsmaður ITV segir fréttirnar af áætlunum Plumb gríðarlegt áfall fyrir allt starfsfólk ITV og This Morning. Holly Willoughby og hennar fjölskylda fái allan þann stuðning sem mögulegt sé að veita á þessum erfiðu tímum.

Dermot O´Leary og Alison Hammond stýra yfirleitt This Morning á föstudögum og í þættinum í morgun vísuðu þau í fréttir fjölmiðla af málinu og sögðust ekki geta talað mikið um það en sendu þó Holly Willoughby og hennar fjölskyldu sínar allra hlýjustu kveðjur.

Rishi Sunak, forsætisráðherra Bretlands, var gestur þáttarins í morgun og sendi Willoughby sínar bestu kveðjur.

Það var Sky News sem greindi frá.