Par, tvö börn þeirra og þrír hundar fjölskyldunnar fundust öll látin síðastliðinn sunnudag á heimili sínu í úthverfi Chicago borgar í Bandaríkjunum. Höfðu bæði mannfólkið og hundarnir verið skotin til bana. Lögreglan segist ekki telja að um morð og sjálfsvíg í kjölfarið hafa verið að ræða og leitar að morðingja.

Fjölskyldan bjó í bænum Romeoville sem er um 42 kílómetra suðvestur af Chicago. Hún fannst látin um hálf níu leytið á sunnudagskvöld þegar lögreglumenn voru sendir að heimili hennar til að kanna hvort eitthvað amaði að eftir að áhyggjufullir ættingjar fjölskyldunnar höfðu haft samband.

Talið er að fjölskyldan hafi verið myrt aðfararnótt sunnudags eða snemma á sunnudagsmorgun.

Fullorðna parið hefur verið nafngreint en þau hétu Alberto Rolon og Zoraida Bartolomei. Hvorki hefur verið greint frá nöfnum barna þeirra tveggja né hversu gömul þau voru.

Meðal þess sem tæknideild lögreglunnar fór með af heimili fjölskyldunnar var tölvuskjár og hluti af glugga. Lögreglan hefur ekki veitt neinar upplýsingar um hver eða yfirhöfðuð hvort einhver er grunaður um morðin.

Nágrannar fjölskyldunnar segja að hún hafi flutt í húsið, þar sem hún fannst látin, fyrir nokkrum mánuðum. Þeir segja fjölskylduna hafa haldið sig að mestu út af fyrir sig og hafi ekki sést oft úti við.

Enginn nágrannanna segist hafa orðið var við skotin. Íbúar húsalengjunnar eru raunar vanir að heyra byssuskot þar sem skotæfingasvæði er um 3 kílómetra í burtu en enginn heyrði þessi skot.

Nágranni fjölskyldunnar, kona, sem búið hefur í húsalengjunni í 20 ár segist aldrei hafa upplifað annan eins viðbúnað lögreglu síðan hún flutti þangað. Hún segist eyðilögð yfir því að þessi unga fjölskylda hafi verið myrt.

Það var CBS News sem greindi frá.