Síðastliðinn laugardag hélt hópur fólks, sem talið er að hafi samanstaðið af allt að 50 einstaklingum, í verslunarmiðstöð í Los Angeles í Bandaríkjunum. Hópurinn var vopnaður úðabrúsum sem innihéldu ertandi efni sem notað er til að úða á birni í árásarhug.

Verslunarmiðstöðin heitir Westfield Topanga Mall og er staðsett í Woodland Hills sem er í vesturhluta borgarinnar. Hópurinn hélt að verslun fyrirtækisins Nordstrom og úðaði úr brúsunum á tvo öryggisverði verslunarinnar sem komu litlum vörnum við eftir það. Fólkið stal síðan lúxus-handtöskum og fötum úr versluninni.

Andvirði varningsins sem stolið var er talið nema allt að 100.000 dollurum (um 13,2 milljónum íslenskra króna)

Lögreglan var að sögn fljót á staðinn en náði ekki að hafa hendur í hári neins af þjófunum. Hún segist hafa ýmsar vísbendingar sem gagnast munu við rannsókn málsins.

Hluti ræningjanna flúði vettvang í BMW-bifreið en hinir í hópnum flúðu á öðrum farartækjum.

Fólk sem statt var í versluninni tók atganginn upp á farsíma sína og á myndböndum sem dreift hefur verið á samfélagsmiðlum má sjá að þjófarnir huldu andlit sín með hettum og grímum. Þeir rifu niður hillur og hver þeirra tók með sér eins mikið af varningi og hann gat borið. Talsverðar skemmdir urðu í versluninni.

Karen Bass, borgarstjóri Los Angeles, sagði að draga yrði fólk sem stæði fyrir slíkum verknaði til ábyrgðar. Hún segir að lögreglan muni finna þá sem stóðu fyrir þessum fjöldaþjófnaði og muni koma í veg fyrir árásir af þessu tagi í framtíðinni.

Samskonar atvik, þar sem stór hópur fólks réðst inn í verslun og stal eins miklu og mögulegt var, átti sér stað síðastliðinn þriðjudag í verslun Yves Saint Laurent í borginni Glendale, sem er í nágrenni Los Angeles. Andvirði varningsins sem sá hópur stal er talið nema um 300.000 dollurum (um 39,7 milljónum íslenskra króna).

Það var NBC sem greindi frá.