Að undanförnu hafa lögreglumenn í Kaupmannahöfn heimsótt söluturna í borginni. Þetta er hluti af aðgerðum lögreglunnar sem beinast gegn ólöglegri sölu á lyfseðilsskyldum lyfjum og ólöglegu tóbaki.

Í síðustu viku lagði lögreglan hald á 15.000 lyfjatöflur, 1.000 dósir af snúsi og 900 einnota rafrettur í söluturnum í borginni.

Lögreglan skýrði frá þessu á Twitter og segir að í tveimur söluturnum á Amager og í Valby hafi verið lagt hald á 15.000 töflur þar á meðal Dolol, Alprazolam, morfín og Viagra auk 130.000 danskra króna í reiðufé.

Einnig fundust 1.000 snúsdósir og um 900 einnota rafrettur. Þrír voru kærðir í tengslum við þetta.

Í söluturnum á Norðurbrú og Austurbrú fann lögreglan um 1.200 pakka af sænskum nikótínpúðum.