Á jóladag árið 1995 fannst hauslaus líkami manns að nafni Christophe Doire í nágrenni við bæinn Busset í Frakklandi. Haus mannsins fannst aldrei en um er að ræða eitt alræmdasta óleysta morð Frakklands.
Nú virðist þó vera sem einhver lausn sé að nást í málinu því fyrr í vikunni var ekkja Christophe handtekin og ákærð fyrir morðið á eiginmanni sínum. Eric Neveu, franskur saksóknari, segir að alvarleg sönnunargögn bendi til þess að hún hafi verið viðriðin morðið á Christophe.
Þetta er ekki í fyrsta skipti sem rannsókn á málinu hefur verið opnuð aftur. Bæði árið 2000 og árið 2002 var ákveðið að rannsaka málið á ný þegar nýjir aðilar voru grunaðir um morðið en ekki tókst að leysa málið í þeim atrennum. Nú er vonast til þess að annað sé uppi á teningnum.
Le Parisian fjallaði um málið en í umfjöllun þeirra er sagt frá því sem vitað er um síðustu dagana í lífi Christophe. Þann 16. desember árið 1995 á Christophe að hafa lent í rifrildi við eiginkonu sína. Rifrildið er sagt hafa endað með því að eiginkonan henti hárblásara í bað Christophe en hárblásarinn var þá tengdur við innstungu.
Eftir það á Christophe að hafa yfirgefið heimili þeirra og farið til bróður síns en þar skipulögðu þeir saman veiði sem þeir ætluðu í næsta dag. Christophe fór frá bróður sínum um hálftíma áður en klukkan sló miðnætti sama kvöld en eftir það virtist vera sem hann hafði gufað upp af yfirborði jarðar.
Það var þó að sjálfsögðu ekki raunin, nokkrum dögum síðar fannst bíllinn hans Christophe og eins og áður segir fannst hauslaus líkami hans nokkrum dögum síðar, á jóladag.