18 ára maður var skotinn til bana í Norsborg í Botkyrka, sem er sunnan við Stokkhólm, í gærkvöldi. Lögreglunni barst tilkynning um að maður, með skotáverka, hefði fundist á bílastæði í Norsborg. Hann var fluttur á sjúkrahús en var úrskurðaður látinn skömmu eftir komuna þangað.

Aftonbladet skýrir frá þessu. Segist blaðið hafa heimildir fyrir að maðurinn hafi verið skotinn mörgum skotum. Blaðið segist hafa heimildir fyrir að maðurinn hafi verið á leið heim af íþróttaæfingu þegar hann var skotinn.

Talsmaður lögreglunnar sagði í nótt að ekki liggi ljóst fyrir hvort maðurinn var skotinn á bílastæðinu þar sem hann fannst eða hvort vettvangurinn sé annars staðar.

Enginn hefur verið handtekinn vegna málsins.