Sænska lögreglan sér merki um að þarlend glæpagengi starfi í auknum mæli saman. Þetta á við um mörg svið, til dæmis innflutning fíkniefna og að auki starfa þau saman þegar kemur að skipulagningu morða og þegar þau þurfa að útvega sér skotvopn og sprengiefni.

Þetta sagði Anna Rise, hjá Stokkhólmslögreglunni, nýlega í samtali við Sænska ríkisútvarpið. Hún sagði að almennt séð sjái lögreglan fleiri merki þess að glæpagengin starfi saman og eigi það við svæðisbundið samstarf, á landsvísu og á alþjóðavettvangi.

„Þetta er meðal annars samstarf um fíkniefni. Það snýst um að panta saman efni sem eru flutt til Svíþjóðar og síðan skipt á milli gengjanna,“ sagði hún.

Hún sagði að lögreglan sjái einnig aukningu á samstarfi gengjanna utan hefðbundinna starfssvæða þeirra.

Svíar hafa lengi glímt við glæpagengi sem eru umsvifamikil í landinu og skirrast einskis. Skotárásir og morð eru nær daglegt brauð en samkvæmt tölum yfirvalda frá því á síðasta ári var Svíþjóð það Evrópuríki þar sem flest morð voru framin með skotvopnum 2018. Það er mikil breyting frá aldamótum en árið 2000 var Svíþjóð neðst á lista yfir fjölda morða, sem voru framin með skotvopnum, í 22 Evrópuríkjum.