„Þú ert ekki hestur. Þú ert ekki kýr. Í alvöru allir. Hættið þessu,“ svona hljóðar færsla frá bandarísku lyfjastofnuninni, FDA, á Twitter. Ástæðan er að sífellt fleiri Bandaríkjamenn eru byrjaðir að nota lyfið Ivermectin gegn kórónuveirunni og það er eitthvað sem heilbrigðisyfirvöldum hugnast ekki.

Ivermectin er aðallega notað til að verja húsdýr gegn sníkjudýrum. Það hefur ekki verið samþykkt til notkunar á fólki og alls ekki sem lyf gegn kórónuveirunni.

Á heimasíðu FDA kemur fram að það sé „skiljanlegt“ og „komi ekki á óvart“ að Bandaríkjamenn horfi í kringum sig í leit að öðrum aðferðum til að takast á við kórónuveiruna, sérstaklega í ljósi þess hversu margir hafa látist af hennar völdum.

You are not a horse. You are not a cow. Seriously, y'all. Stop it. https://t.co/TWb75xYEY4

— U.S. FDA (@US_FDA) August 21, 2021

Sumum er gefið Ivermectin gegn sníkjudýrum en FDA leggur áherslu á að það sé mikill munur á því Ivermectin sem húsdýr fá og því Ivermectin sem fólk fær. Mesti munurinn er á styrkleika lyfsins. „Fyrst og fremst er lyfið fyrir húsdýr sterkara því það er notað fyrir stór dýr á borð við hesta og kýr sem eru mun þyngri en við. Svo stórir skammtar geta verið fólki hættulegir,“ segir á heimasíðunni.

NBC segir að afleiðingar þess að nota Ivermectin geti verið allt frá ógleði og uppköstum til þess að enda í dái og deyja. Segir miðillinn að það sé aðallega mikil dreifing rangra upplýsinga sem hafi orðið til þess að FDA hafi nú gripið til þess ráðs að vara við notkun Ivermectin.