fbpx
Föstudagur 16.apríl 2021
Pressan

Norður-Kórea keppir ekki á Ólympíuleikunum vegna smithættu – Er ástæðan kannski önnur?

Kristján Kristjánsson
Miðvikudaginn 7. apríl 2021 23:00

Norður-Kórea tekur ekki þátt í Ólympíuleikunum í Tókýó. Mynd:Getty

Ekki missa af Helstu tíðindum dagsins í pósthólfið þitt

Lesa nánar

Stjórnvöld í Norður-Kóreu sendu frá sér tilkynningu í gær um að landið muni ekki senda íþróttamenn til keppni á Ólympíuleikunum í Tókýó í Japan í sumar. Ástæðan er að þeirra sögn að of áhættusamt sé fyrir íþróttamennina að keppa vegna heimsfaraldurs kórónuveirunnar. Áður hafði verið tilkynnt að engir erlendir áhorfendur fái að sækja leikana og að íþróttamönnunum standi til boða bólusetning með kínversku bóluefni.

Að mati Phillip Khokar, fréttaritara Danska ríkisútvarpsins í Asíu, er ástæðan önnur en sú sem stjórnvöld gefa upp. Hann segir að stjórnvöld í Norður-Kóreu glími nú við ýmis vandamál og að það væri erfitt fyrir þau, út frá pólitísku sjónarmiði, að senda íþróttamenn til Japan því Japanir séu taldir með verstu óvinum Norður-Kóreu.

Meðal þeirra vandamála sem stjórnvöld í Norður-Kóreu glíma við er að landamæri landsins hafa verið algjörlega lokuð síðan í janúar til að reyna að halda kórónuveirunni frá landinu. Þetta hefur haft í för með sér að matvælainnflutningur frá Kína hefur nær algjörlega lagst af. Alþjóðleg hjálparsamtök segja að þetta valdi því að hungursneyðin í landinu nálgist nú sama stig og á tíunda áratugnum en þá er talið að allt að tvær milljónir landsmanna hafi látist úr hungri.

Lokun landamæranna hefur einnig haft í för með sér að nær engir útlendingar eru nú í landinu. Flestir alþjóðlegir fjölmiðlar hafa kallað starfsfólk sitt heim og flestir stjórnarerindrekar hafa einnig yfirgefið landið. Khokar segir að af þessum sökum sé erfitt að öðlast yfirsýn yfir stöðu mála í landinu. Hann segir að flest bendi til að heimsfaraldurinn hafi komið illa við landið sem á í erfiðleikum með að brauðfæða alla og tryggja landsmönnum eðlilegt líf. Það að hætt hafi verið við þátttöku á Ólympíuleikunum verði að skoða í þessu ljósi, norður-kóreskt samfélag berjist nú einfaldlega fyrir lífi sínu. Hann segist einnig telja að svo mikill skortur sé á ýmsum hráefnum og vörum í landinu að það geti reynst erfitt að útvega nægt eldsneyti fyrir flugvél til að flytja íþróttamennina til Japan. Það er því kannski ekki beinn ótti við smit sem heldur Norður-Kóreu frá þátttöku.

Athugasemdir eru á ábyrgð þeirra sem þær skrá. DV áskilur sér þó rétt til að eyða ummælum sem metin verða sem ærumeiðandi eða ósæmileg. Smelltu hér til að tilkynna óviðeigandi athugasemdir.

Fleiri fréttir

Mest lesið

Nýlegt

Högg í maga Arsenal
Pressan
Í gær

Þetta eru ástæðurnar fyrir að Danir hætta að nota bóluefni AstraZeneca

Þetta eru ástæðurnar fyrir að Danir hætta að nota bóluefni AstraZeneca
Pressan
Í gær

Dularfullt mannshvarfsmál leyst eftir 20 ár – „Hjarta mitt er brostið“

Dularfullt mannshvarfsmál leyst eftir 20 ár – „Hjarta mitt er brostið“
Pressan
Fyrir 2 dögum

Svíþjóðardemókratarnir komast til áhrifa á sænska þinginu

Svíþjóðardemókratarnir komast til áhrifa á sænska þinginu
Pressan
Fyrir 2 dögum

Ný rannsókn – Breska afbrigði kórónuveirunnar er ekki banvænna en önnur afbrigði

Ný rannsókn – Breska afbrigði kórónuveirunnar er ekki banvænna en önnur afbrigði