„Nuddauglýsingarnar“ eru ekkert annað en auglýsingar frá konum og körlum sem selja vændi. Ekstra Bladet hefur eftir Estella, sem er talskona samtaka starfsfólks í kynlífsiðnaðinum, að þetta sé mjög slæm ákvörðun hjá Ekstra Bladet og að samtökin séu leið yfir henni fyrir hönd þeirra sem starfa í kynlífsiðnaðinum.
Sjálf sagðist hún hafa auglýst í blaðinu og að allar „gerðir“ kynlífsstarfsmanna hafi auglýst í blaðinu og á vefmiðli þess. „Ekstra Bladet er viðurkenndur, opinber og löglegur fjölmiðill þar sem starfsfólki í kynlífsiðnaðinum hefur verið gert jafn hátt undir höfði og öðrum. Þar hefur Coca Cola verið, McDonalds, flutningafyrirtæki og starfsfólk í kynlífsiðnaðinum. Þetta er svo „áþreifanlegt“, að við höfum verið hluti af þessu öllu, þar sem okkur hefur fundist að við værum þátttakendur og ekki útilokuð eins og einhver sem maður vill ekki leika með,“ sagði Estella.
Þegar tilkynnt var um starfslok Madsen sagði hann að það að hætta birtingu „nuddauglýsinga“ hafi verið það síðasta sem var ólokið í þeirri vegferð að nútímavæða blaðið.
Blaðið hefur margoft verið gagnrýnt fyrir að birta auglýsingar af þessu tagi, til dæmis eftir að fjölmiðlar sýndu fram á að á bak við sumar þessara auglýsinga voru konur sem höfðu verið seldar mansali. Þær hafa einnig verið gagnrýndar í tengslum við #MeToo-umræðuna. Madsen sagði tímabært að hlusta á þessa gagnrýni og hætta birtingu auglýsinga af þessu tagi.
Nú þarf starfsfólk í kynlífsiðnaðinum því að finna sér nýjan vettvang fyrir auglýsingar sínar en ekkert annað danskt dagblað birtir auglýsingar af þessu tagi og það gera samfélagsmiðlar á borð við Facebook og Instagram heldur ekki.
