Er tannburstinn þinn þakinn bakteríum úr klósettinu? Bakteríum sem berast með örsmáum dropum þegar sturtað er niður? Ef svo er þá er það frekar ógeðfelld tilhugsun. En vísindamenn hafa nú rannsakað málið og niðurstöður þeirra verða að teljast ansi góðar.

Þeir segja að það skipti engu hvort tannburstinn standi í glasi við vaskinn eða í lokuðum skáp því bakteríurnar á honum séu í langflestum tilfellum hinar sömu og eru  í munni þínum eða húð. Videnskab.dk skýrir frá þessu.

Vísindamenn við Northwestern University í Illinois í Bandaríkjunum kalla rannsóknina „Operation Pottymouth“ en í henni rannsökuðu þeir notaða tannbursta. „Ég segi ekki að það geti ekki komið örverur á tannbursta þegar sturtað er niður en miðað við það sem við sáum í rannsókninni þá koma þær flestar úr munni þínum,“ segir Erica Hartmann, meðhöfundur rannsóknarinnar, í fréttatilkynningu.

„Munnur þinn og magi eru ekki tvær aðskildar „eyjur“. Sumar örverur eru bæði í maga og munni og þar með einnig á tannburstanum. En líklega koma þessar örverur upphaflega úr munni þínum,“ sagði hún einnig.