Danski leikfangaframleiðandinn Lego hefur átt góðu gengi að fagna eftir að heimsfaraldur kórónuveirunnar skall á. Salan hefur slegið öll met og hagnaður fyrirtækisins á fyrri helmingi yfirstandandi árs var 140% meiri en á sama tíma á síðasta ári. Starfsmenn fyrirtækisins munu njóta þessarar góðu afkomu.

Allir starfsmenn fyrirtækisins, um 20.000 talsins, fá þrjá aukafrídaga og sérstaka bónusgreiðslu.

Sala á Lego hefur aukist mikið á tímum heimsfaraldursins og vöxtur fyrirtækisins í Kína hefur verið góður og hraður. Í tilkynningu frá fyrirtækinu segir að eigendur þess vilji þakka starfsmönnunum fyrir góð störf með því að gefa þeim þrjá aukafrídaga nú í árslok.

Hagnaður fyrirtækisins á fyrri helmingi ársins var 6,3 milljarðar danskra króna. Veltan jókst um 46% á fyrri helmingi ársins miðað við sama tíma á síðasta ári.

Starfsmennirnir fá bónusinn greiddan í apríl á næsta ári.