Kínversk stjórnvöld hafa látið meira að sér kveða í Hong Kong á undanförnum misserum til að berja niður kröfur um lýðræði, tjáningarfrelsi og mannréttindi. Þetta veldur forkólfum í viðskiptalífinu áhyggjum og þykir mörgum nóg um, nóg sé að glíma við áhrif heimsfaraldursins þótt þetta bætist ekki við.
Aðförin að mannréttindum og lýðræði sem og frjálsum fjölmiðlum hefur haft í för með sér að mikill fjöldi fólks hefur flúið land og nokkur fyrirtæki hafa nú þegar tilkynnt að þau séu á förum. Þar má nefna fjölmiðlafyrirtækið Initium sem er að flytja til Singapúr. Í opnu bréfi sagði ritstjóri þess, Susie Wu, að fyrirtækið muni halda áfram rekstri á netinu „samtímis og leiðin til frelsis verður sífellt ótraustari“. The Guardian skýrir frá þessu.
Önnur fyrirtæki eru kannski ekki að hugsa um að flytja alfarið frá Hong Kong en mörg eru farin að styrkja starfsemi sína í Singapúr, sem er aðalkeppinautur Hong Kong í Asíu, hefur The Guardian eftir Frederick Gollob, formanni Evrópska viðskiptaráðsins í Hong Kong. Hann sagði að Hong Kong hafi alltaf verið talið veita öruggt starfsumhverfi þar sem lög sjálfstjórnarsvæðisins hafi byggst á breskum lögum og fyrirtæki gátu treyst á sanngjarna málsmeðferð. Nú séu fyrirtæki efins um hversu traust lagaumhverfið er og íhuga því flutning að hans sögn.
Á síðasta ári fluttu tæplega 90.000 manns frá Hong Kong og hafa aldrei fleiri flust á brott á einu ári síðan farið var að halda utan um skráningar þess efnis. Íbúum sjálfstjórnarsvæðisins fækkaði um 1,2% á síðasta ári og eru nú 7,39 milljónir.
