„Nei takk við þessum stóra svarta skúlptúr fyrir utan gluggana mína. Hann mun standa 3-5 metra frá útsýninu mínu,“ segir í einni af þeim athugasemdum sem íbúar í A/B Vennelyst við Christmas Møller Plads á Amager í Kaupmannahöfn sendu skipulagsyfirvöldum í kjölfar grenndarkynningar á höggmyndinni „Porten til Amager“ sem stendur til að setja upp.

9 athugasemdir bárust og af þeim voru 8 gagnrýnar á staðsetningu höggmyndarinnar. En samt sem áður hefur skipulagsnefnd borgarinnar komist að þeirri niðurstöðu að íbúarnir hafi samþykkt staðsetningu höggmyndarinnar.

Lítil eining hefur ríkt um höggmyndina og meðal annars sagði Rune Dybvad, fulltrúi jafnaðarmanna í skipulagsnefnd Kaupmannahafnarborgar, að hún væri eins og „kynlífsleikfang fyrir endaþarm“.

Þegar skipulagsnefndin greiddi atkvæði um staðsetningu höggmyndarinnar sátu allir þrír fulltrúar jafnaðarmanna hjá. Þeir sögðu að þeir væru ósammála mati stjórnsýslunnar á þeim athugasemdum sem bárust vegna málsins og ljóst sé að nágrannarnir vilji ekki hafa höggmyndina á þessum stað. En fulltrúar annarra flokka í nefndinni voru þessu ekki sammála og greiddu atkvæði með því að „Porten til Amager“ verði staðsett á Christmas Møller Plads. Því munu íbúar þar geta virt „kynlífsleikfang fyrir endaþarm“ fyrir sér í framtíðinni þegar þeir líta út um glugga sína.