Hvað var 26 Sýrlendingur, sem bjó í Vanløse, að gera á Norðurbrú í Kaupmannahöfn um klukkan 23 á þriðjudagskvöldið? Af hverju var ráðist á hann og hann stunginn til bana? Þetta eru spurningar sem lögreglan í Kaupmannahöfn reynir að svara en skömmu fyrir klukkan 23 á þriðjudagskvöldið var fyrrnefndur Sýrlendingur myrtur á Hans Tavsens Gade á Norðurbrú.

Enginn hefur verið handtekinn vegna málsins og lögreglan veit ekki hvort einn eða fleiri voru að verki. Hún veit heldur ekki af hverju maðurinn var myrtur. Þetta hefur Ekstra Bladet eftir Bjarke Dalsgaard Madsen, sem stýrir rannsókninni.

Hann sagði að lögreglan vilji gjarnan heyra frá fólki sem sá eitthvað á vettvangi á þriðjudagskvöldið. Það gæti til dæmis verið rifrildi eða eitthvað sem virtist ekki grunsamlegt á þeim tímapunkti en gæti hafa skipt máli um atburðarásina. Hann sagði að lögreglan vilji einnig gjarnan heyra frá fólki sem sá fórnarlambið þetta kvöld eða er með upptökur úr eftirlitsmyndavélum.

Umfangsmikil vettvangsrannsókn lögreglunnar stóð yfir þar til síðdegis í gær en þá kom slökkviliðið að lokum og skolaði blóð í burtu og lauk vettvangsrannsókninni þar með.

Fórnarlambið var 26 ára sýrlenskur karlmaður sem hafði búið í Danmörku í um tíu ár.