Eric Adams verður borgarstjóraefni Demókrata í borgarstjórnarkosningum í New York í nóvember. Þetta var tilkynnt á þriðjudaginn þegar niðurstöður úr forvali flokksins lágu fyrir, tveimur vikum eftir að kosið var. Adams, sem er fyrrverandi lögreglumaður, hlaut 50,5% atkvæða en mótframbjóðandi hans Kathryn Garcia 49,5%.

Adams er talinn eiga góða möguleika á að sigra Curtis Sliwa, frambjóðanda Repúblikana. Ef Adams, sem er sextugur, sigrar verður hann annar svarti borgarstjórinn í milljónaborginni. Sá fyrsti og eini fram að þessu var David Dinkins, sem er látinn, sem var borgarstjóri frá 1990 til 1993.

Í yfirlýsingu frá Adams segir hann að nú verði að einblína á kosningarnar í nóvember svo hægt verði að standa við gefin loforð við þá borgarbúa sem berjast í bökkum og eiga skilið að eiga örugga framtíð.