Um klukkan 23 í gærkvöldi var tilkynnt að maður hefði verið skotinn á götu úti í íbúðarhverfi í Rinkeby í norðvesturhluta Stokkhólms. Maðurinn var strax fluttur á sjúkrahús en hann var með lífshættulega áverka.

Samkvæmt fréttum sænskra fjölmiðla þá er talið að skotárásin tengist átökum glæpagengja en fórnarlambið hefur tengsl við glæpagengi.

Lögreglan hefur unnið að rannsókn málsins í alla nótt og leitar árásarmannsins eða árásarmannanna.

Aftonbladet segist hafa heimildir fyrir að árásarmaðurinn eða árásarmennirnir hafi flúið af vettvangi á rafskútu. Talsmaður lögreglunnar vildi ekki tjá sig um þetta sérstaklega en sagði að lögreglan hefði fengið ýmsar ábendingar um hvernig árásarmaðurinn eða mennirnir hefðu yfirgefið vettvang.