Bandaríkjamaðurinn Brendan Banfield hefur verið dæmdur í lífstíðarfangelsi án möguleika á reynslulausn fyrir morð á eiginkonu sinni og saklausum manni sem hann lokkaði að heimili fjölskyldunnar. Um var að ræða flókið samsæri sem Brendan skipulagði með au pair-stúlku sem hann átti í ástarsambandi við.

Brendan var í febrúar síðastliðnum fundinn sekur um morð á eiginkonu sinni, Christine Banfield, 37 ára hjúkrunarfræðingi á gjörgæslu barna, og Joseph Ryan, 39 ára manni sem var lokkaður að heimili fjölskyldunnar í Virginíuríki í febrúar árið 2023.

Málið vakti mikla athygli þegar réttarhöld hófust fyrr á árinu. Þá kom fram að Banfield hefði átt í ástarsambandi við Juliana Peres Magalhaes, 25 ára konu frá Brasilíu sem starfaði sem au pair á heimili fjölskyldunnar.

Vildi ekki skilja við eiginkonuna

Samkvæmt vitnisburði Magalhaes hafði Brendan sagt henni haustið 2022 að hann vildi „losna við“ eiginkonu sína. Skilnaður væri ekki raunhæfur kostur þar sem fjárhagslegir hagsmunir væru í húfi og hann vildi ekki hætta á að missa forræði yfir dóttur þeirra.

Saksóknarar sögðu að Brendan og Magalhaes hefðu búið til notandaaðgang á vefsíðu sem þjónar fólki sem stundar BDSM. Þar hafi þau gefið sig út fyrir að vera Christine Banfield og komið sér í samband við Ryan.

Í samskiptunum var Ryan látinn trúa því að hann væri að taka þátt í kynferðislegum hlutverkaleik með samþykki allra aðila, þar sem meðal annars átti að nota fjötra og hníf.

Lokkaður í dauðagildru

Saksóknarar sögðu að markmið Brendan hefði verið að nota Ryan sem peð í morðáætluninni.

Þann 23. febrúar 2023 mætti Ryan á heimili fjölskyldunnar samkvæmt fyrirfram ákveðnu plani. Þar er Brendan sagður hafa skotið hann í höfuðið. Að því loknu hafi hann ráðist á eiginkonu sína með hnífi og stungið hana til bana.

Að sögn saksóknara var ætlunin að láta líta út fyrir að Ryan hefði ráðist á Christinu með hnífi og veitt henni lífshættulega áverka. Hún hefði síðan skotið hann til bana í sjálfsvörn áður en henni blæddi út.

Magalhaes játaði á síðasta ári sök í manndrápi vegna dauða Ryans eftir samkomulag við saksóknara. Hún samþykkti jafnframt að bera vitni gegn Brendan gegn því að fá vægari dóm.

Dómarinn Penney Azcarate fór hörðum orðum um Brendan við dómsuppkvaðninguna.

„Virðingarleysið gagnvart lífi eiginkonu þinnar, manneskju sem þú sagðist elska, er nánast óskiljanlegt,“ sagði hún áður en hún dæmdi hann til lífstíðarfangelsis án möguleika á reynslulausn.