Framvegis má hljóðstyrkurinn, þegar kallað er til bæna í moskum í Sádi-Arabíu, aðeins vera þriðjungur þess sem hann hefur verið fram að þessu.  Ráðuneytið íslamskra málefna tilkynnti þetta í síðustu viku. Þetta hefur vakið mikla athygli því margir af heilögustu stöðum íslamskrar trúar eru í Sádi-Arabíu.

Ráðherra íslamskra málefna segir að ákvörðunin hafi verið tekin vegna fjölda kvartana yfir hávaða frá bænaköllunum. Meðal annars frá foreldrum sem voru ósáttir við að svefn barna þeirra var truflaður með bænaköllum.

Bannið hefur einnig í för með sér að aðeins má nota hátalara á moskum til að kalla til bæna en ekki til að útvarpa heilu prédikununum.

Íhaldssamir múslimar eru mjög ósáttir við þetta en ráðherrann vísaði gagnrýni þeirra á bug og sagði: „Þeir sem vilja biðja þurfa ekki að bíða eftir að kallað sé til bæna. Þeir ættu að vera við moskuna áður en til þess kemur,“ sagði hann. Hann benti einnig á að prédikanir og upplestur úr Kóraninum sé sýndur á mörgum sjónvarpsstöðvum og því sé þörfin fyrir hátalarana takmörkuð.