Veiðimaður var drepinn af grábirni í Wrangell-St. Elias þjóðgarðinum í Alaska um síðustu helgi. Þetta er í fyrsta sinn sem grábjörn verður manneskju að bana í þjóðgarðinum.

Veiðimaðurinn var í 10 daga veiðiferð með vini sínum en þeir ætluðu að veiða elg. Þeir voru nærri Chisana River þegar grábjörninn réðst á þá á sunnudaginn að sögn þjóðgarðsyfirvalda.

Í tilkynningu frá þjóðgarðsyfirvöldum segir að á þeim 40 árum sem eru liðin síðan þjóðgarðurinn var stofnaður hafi aldrei verið tilkynnt um mannskæða árás grábjarna. Gestir garðsins eru hvattir til að sýna aðgæslu. Fram kemur í tilkynningunni að grábirnir forðist yfirleitt fólk ef þeir sjá það eða heyra og mjög sjaldgæft sé að þeir ráðist á fólk. Ef fólk verður fyrir árás er besta ráðið að leggjast á magann með glennta fætur og þykjast vera dáinn.