Þetta kemur fram í tilkynningu frá US National Institutes of Health (NIH) sem er ein af undirstofnunum bandaríska heilbrigðisráðuneytisins.
Jennifer Haller, 43 ára tveggja barna móðir, fékk fyrstu sprautuna af bóluefni og fleiri fylgdu síðan í kjölfarið. Bóluefnið verður prófað á 45 heilbrigðum einstaklingum á aldrinum 18 til 55 ára næstu sex vikurnar.
Bóluefnið hefur hlotið nafnið mRA-1273. Það var þróað af vísindamönnum NIH í samvinnu við líftæknifyrirtækið Moderna í Cambridge í Massachusetts.
Anthony Facui, yfirmaður smitsjúkdómadeildar NIH, segir að það sé „forgangsverkefni fyrir lýðheilsu“ að búa til bóluefni gegn COVID-19 kórónuveirunni sem hefur orðið rúmlega 7.000 manns að bana fram að þessu. Hann segir að þetta fyrsta skref sem nú sé stigið sé mjög mikilvægt til að ná því markmiði að búa til bóluefni.
En það er rétt að hafa í huga að hér er aðeins um fyrsta skref að ræða, það getur liðið ár til hálft annað ár þar til bóluefnið hefur verið fullprófað og verður tilbúið til almennrar notkunar.