Kosningaframboð Joe Biden hefur fengið háar fjárhæðir í styrki, meðal annars frá áhrifafólki í bandarísku viðskiptalífi. En sumum þingmönnum gengur einnig vel að afla fjár. Þar má nefna Jaime Harrison sem býður sig fram til öldungadeildarinnar í Suður-Karólínu. Þar tekst hann á við Repúblikanann Lindsey Graham. Fyrir ekki svo löngu hefðu flestir talið þetta dauðadæmt framboð hjá Harrison því Graham er sitjandi öldungadeildarþingmaður og harður stuðningsmaður Donald Trump. En miðað við fjárframlögin þá virðast margir reiðubúnir til að styðja Harrison í baráttunni. Á þriðja ársfjórðungi aflaði framboð hans 57 milljóna dollara í styrki. Uppistaðan eru litlir styrkir, að meðaltali upp á 37 dollara. Upphæðin er svo há að það er eiginlega vandséð að Harrison takist að eyða henni allri.
Ef Harrison, sem er svartur, sigrar sest hann í sæti sem áður „tilheyrði“ Strom Thurmond sem var ákafasti talsmaður aðskilnaðar kynþáttanna á Bandaríkjaþingi.
En víðar í Bandaríkjunum eru Repúblikanar langt á eftir Demókrötum í fjársöfnun vegna kosninganna. Þetta er ný staða því flokkurinn hefur yfirleitt verið flokkur fjármagnseigendanna sem hafa dælt fé í hann. En nú er staðan önnur og hugsanlega tengist það óánægju margra með Donald Trump og störf hans.
Í mars átti framboð Joe Biden 12 milljónir dollara en framboð Trump átti þá 94 milljónir. En síðan þá hefur staðan gjörbreyst og í byrjun október átti framboð Biden 177 milljónir en framboð Trump 63 milljónir.
Þetta hefur gert framboð Biden að yfirburðaframboði hvað varðar möguleikana á að auglýsa í sjónvarpi og á samfélagsmiðlum. Í september eyddi framboð hans 173 milljónum í sjónvarpsauglýsingar en framboð Trump 69 milljónum eftir því sem Advertising Analytics gagnabankinn segir.
Hugveitan Center for Responsive Politicsw telur að kosningabaráttan í Bandríkjunum geti kostað 11 milljarða dollara að þessu sinni. 2016 var kostnaðurinn 6,5 milljarðar.
