Slóvakíski stjórnmálamaðurinn Marian Kotleba hefur verið dæmdur í fjögurra ára fangelsi fyrir að hafa breitt hatursræðu út með duldum boðskap. Það sem hann gerði var að gefa fátækum 1.488 evrur en þetta telur dómstóll vera dulda nasistakveðju.

Sérstakur dómstóll í Bratislava fann Kotleba sekan um að hafa dreift hatursræðu með duldum hætti. Hann er stofnandi öfgahægri flokksins „Flokkur fólksins – Okkar Slóvakía“ sem er með 14 sæti á þingi landsins. Flokkurinn hefur lýst yfir aðdáun sinni á stjórn landsins á dögum síðari heimsstyrjaldarinnar en þá stýrði Jozef Tiso landinu.

Stjórnin átti að heita óháð en var í raun leppstjórn nasistastjórnar Hitlers.

Kotleba var fundinn sekur um að hafa breytt út boðskap nasista þegar hann gaf fátækum fjölskyldum 1.488 evrur þegar hann tók þátt í fagnaði vegna afmælis stjórnar Tiso. Dómstóllinn segir að talan 1.488 sé engin tilviljun því hún vísi til nasista hjá þeim sem aðhyllast þá skoðun að hvítt fólk sé yfir aðra kynþætti hafið.

Fyrsti hluti tölunnar er tilvísun til 14 stafa slagorðs nasista og síðari helmingurinn vísar til nasistakveðjunnar „Heil Hitler“. Kotleba var fundinn sekur um að hafa stutt hreyfingu sem hefur að markmiði að afnema grundvallarfrelsi fólks.

Kotleba getur áfrýjað til hæstaréttar. Ef hann staðfestir dóminn á hann á hættu að missa þingsæti sitt.

Jozef Tiso var tekinn af lífi 1947 fyrir stríðsglæpi en hann var fundinn sekur um að hafa sent 58.000 gyðinga úr landi.