Nú standa yfir tökur á nýrri þáttaröð um Hringadróttinssögu eftir J.R.R. Tolkien á vegum Amazon efnisveitunnar. Margir bíða spenntir eftir þáttunum en þess er vænst að ekkert verði til sparað til að gera þá sem glæsilegasta úr garði.

Það hefur vakið athygli aðdáenda að framleiðslufyrirtækið, sem er nú við upptökur á Nýja-Sjálandi, hefur auglýst eftir þarlendum leikurum sem eru reiðubúnir til að koma naktir fram. Í boði eru sem svarar rúmlega 60.000 íslenskum krónum í laun á dag. Sérstaklega er tekið fram í auglýsingunni að fólk af öllum stærðum sé velkomið ef það er 18 ára eða eldra. Comicbook.com skýrir frá þessu.

Það þykir vísbending um að kynlíf komi við sögu í þáttunum að framleiðslufyrirtækið hefur ráðið „siðgæðisvörð“ til starfa til að tryggja að allt fari vel fram og að ekki verði brotið á neinum.

Þáttaröðin gerist á undan Hobbitanum og Hringadróttinssögu þríleikjunum sem margir kannast við.