Í desember 2018 lést Amy Louise Thorpe skyndilega aðeins þrítug að aldri. Hún átti þrjú börn og var gengin fjóra mánuði með það fjórða. Samkvæmt frétt New Zealand Herald er nú verið að rannsaka andlát hennar og hvort mikil neysla hennar á kóladrykkjum hafi átt hlut að máli.

Thorpe fannst látin á heimili sínu í Invercargill. Eiginmaður hennar segir að hún hafi drukkið um tvo lítra af Coca-Cola á dag og um einn lítra af orkudrykkjum. Þessir drykkir innihalda mikið koffín.

Síðustu mánuði lífs síns hafði Thorpe fengið nokkur köst, sem líktust flogaveikisköstum, hún glímdi við kæfisvefn, þunglyndi og kvíða.

Vinkona hennar, Madonna Bresolini-Meikle, sagði lögreglunni að Thorpe hafi drukkið meira magn af orkudrykkjum daglega en fólk drekki venjulega af kaffi. Thorpe reykti einnig eða um 80 grömm á viku.

Mánuði áður en hún lést var hún send til taugalæknis sem ráðlagði henni að taka lyf við köstunum og að fara í heilamyndatöku. Thorpe vildi ekki taka lyfin né fara í myndatökuna. Læknirinn, Graeme Hammond-Tooke, telur að mikil koffínneysla hennar hafi átt stóran þátt í dauða hennar.

Fyrir tíu árum lést Natasha Harris þrítug að aldri af völdum hjartaáfalls. Hún bjó einnig í Invercargill. Við rannsókn á andláti hennar kom fram að hún hafi drukkið átta til tíu lítra af kóladrykkjum á dag. Eiginmaður hennar sagði dánardómsstjóra að hún hafi byrjað daginn á að drekka kóladrykk og það hafi verið það síðasta sem hún gerði á hverju kvöldi, hún hafi verið háð kóladrykkjum.

Hann sagði einnig að hún hafi verið lystarlítil og hafi reykt um 30 sígarettur á dag. Síðustu mánuðina fyrir andlátið kastaði hún mikið upp, blóðþrýstingur hennar var hár og hún var orkulítil.

Réttarmeinafræðingar komust að þeirri niðurstöðu að gríðarleg neysla hennar á kóladrykkjum hafi átt stóran hlut að máli varðandi andlát hennar.