Það verður að segjast að umhverfis- og náttúrvernd er ekki eitthvað sem er ofarlega á listanum yfir forgangsverkefni Donald Trump, Bandaríkjaforseta, og stjórnar hans. Stefnan hefur heldur verið í hina áttina, að draga úr náttúruvernd og ganga nærri dýrum og plöntum. Nýjasta ákvörðun stjórnarinnar er mjög umdeild en samkvæmt henni verður enn auðveldara að veiða birni og úlfa í þjóðgörðum og verndarsvæðum en áður, sérstakleg í Alaska.

Samkvæmt frétt Anchorage Daily News þá hefur stjórn Trump sett nýjar reglur sem heimila veiðar á björnum og úlfum í híðum þeirra og grenjum.

Mörg náttúruverndarsamtök, þar á meðal Defenders of Wildlife, gagnrýna þetta og segja þetta vera beina ógn við vistkerfi og dýralíf í þjóðgörðum og á verndarsvæðum.

„Stjórn Trump hefur náð nýjum lægðum í meðhöndlun sinni á villtum dýrum.“

Segir Jamie Rappaport Clark, forseti Defenders of Wildlife, í fréttatilkynningu.

„Það er villimannslegt að heimila aflífun bjarnarhúna og ylfinga í híðum og grenjum. Reglurnar gera að engu aðalmarkmið náttúruverndarsvæðanna um að vernda og varðveita náttúruna og villt dýr.“