Í síðustu viku var haldin ráðstefna í Texas þar sem viðskipti með kannabis voru viðfangsefnið. Ráðstefnan gekk undir heitinu South by Southwest. Þar kom fram að Greg Anderson og Cerescoin hafa búið til fyrstu bandarísku rafmyntina sem á að nota til viðskipta með kannabis.

Kannabis er vaxandi iðnaður í Bandaríkjunum enda hefur sala og notkun þess verið leyfði í nokkrum ríkjum og ekki ólíklegt að fleiri fylgi í kjölfarið. Á þessu byggist hugmynd Anderson.  Hann segir að bæði kannabis og rafmynt séu í sókn og fólk sé nánast örvæntingarfullt eftir að þessir tveir hlutir verði sameinaðir.

Hann hefur stofnað Cerescoin en það er fyrsta rafmyntin sem er hægt að nota við kaup á kannabis í Bandaríkjunum. Hún hefur ekki enn verið samþykkt af bandaríska fjármálaeftirlitinu en Anderson er vongóður um að hún verði samþykkt. Að baki er 14 mánaða ferli til að fá rafmyntina samþykkta og vonast hann til að samþykki fáist innan nokkurra vikna.

En af hverju er þörf fyrir rafmynt til kannabisviðskipta? Ástæðan er að í Bandaríkjunum lúta bankar og fjármálastofnanir eftirliti, lögum og reglum alríkisins en ekki hvers ríkis fyrir sig. Þetta hefur í för með sér að bankar hafa ekki heimilað notkun greiðslukorta við kannabisviðskipti í þeim ríkjum þar sem slík viðskipti eru lögleg. Af þeim sökum fer stærsti hluti viðskiptanna fram með reiðufé.

33 ríki heimila notkun kannabis í læknisfræðilegum tilgangi og 10 heimila fólki að nota kannabis án þess að það sé í lækningaskyni.

Hugmynd Anderson gengur út á að gengi rafmyntarinnar verði fasttengt dollaranum. Fólk geti millifært peninga frá greiðslukortum sínum inn á rafmyntareikninginn og notað hann til að greiða fyrir kannabis.