David Browne, blaðamaður Rolling Stone-tímaritsins, fjallaði nýlega um lagið sem hefur verið kallað „dularfyllsta lagið á internetinu“. Í grein sinni ræðir hann meðal annars við Þjóðverja að nafni Darius S. sem stundaði það að taka upp á kassettur uppáhalds útvarpsþættina sína.
Lagið sem um ræðir var einmitt á einni slíkri kassettu sem rennir stoðum undir það að hljómsveitin sé frá Þýskalandi eða nágrannalöndum Þýskalands. Í viðtalinu segist Darius telja að upptakan sé frá árinu 1984 en hann veit það ekki með fullri vissu.
Kassettan lá óhreyfð ofan í kassa allt til ársins 2007 að systir Dariusar fann hana. Umrætt lag vakti athygli hennar en henni var þó fyrirmunað að komast að nafni lagsins eða hvaða hljómsveit stóð á bak við flutninginn. Hún leitaði því á náðir netverja en enginn virtist vita neitt um lagið.
Leitin að hljómsveitinni fór aftur í gang í sumar á vefnum Reddit en, eins og svo oft áður, var enginn með svör á reiðum höndum. Í grein sinni ræðir David við útvarpsmann sem talinn er hafa spilað lagið í einum af þáttum sínum fyrir margt löngu. Hann klórar sér líka í kollinum en hefur engar frekari upplýsingar um málið.
„Ég skil ekki þessi læti. Ef ég teldi að þetta væri það besta síðan skorið brauð væri ég kannski áhugasamur. En mér finnst þetta lag ekkert sérstakt,“ segir hann.
Dæmi hver fyrir sig en lagið má heyra hér að neðan: