Ef Miami í Flórída á að lifa loftslagsbreytingarnar af þarf að hækka vegi og hús og vernda þarf drykkjarvatnið en hætta er á að saltvatn komist í það. Miami er byggð á kalksteinsundirlagi og vatn er allt í kringum borgina sem má kannski líkja við Feneyjar að vissu leyti.

Samkvæmt svartsýnustu loftslagsskýrslum mun yfirborð sjávar hækka um einn metra við hluta suðurodda Flórída fyrir næstu aldamót. Það mun hafa í för með sér að stór hluti af Miami fer undir sjó. Borgaryfirvöld hafa nú þegar brugðist við þessu og hafa nú þegar eytt mörg hundruð milljónum dollara í að hækka vegi með því að leggja nýja ofan á þá gömlu. Sum hverfi borgarinnar hafa verið hækkuð um rúmlega einn metra. Öflugt dælukerfi er síðan notað til að reyna að vernda borgina og drykkjarvatnið frá flóðum.

Suðurhluti Flórída er eitt þeirra svæða í Bandaríkjunum sem mun fara verst út úr loftslagsbreytingunum. Í nýlegri skýrslu frá bandarísku ríkisstjórninni kemur fram að loftslagsbreytingarnar muni valda miklu tjóni í Bandaríkjunum, bæði á eigum fólks og innviðum. Í skýrslunni, sem var unnin af 300 vísindamönnum, kemur fram að ef ekki verður gripið til harkalegra aðgerða til að takmarka losun gróðurhúsalofttegunda muni tjónið hlaupa á hundruðum milljarða dala árlega. Þessari svörtu framtíð finna húseigendur í Miami nú þegar fyrir en verð á lúxusvillum nærri sjónum hefur þegar lækkað og fer lækkandi.