Þrettán ára piltur í Kaliforníu í Bandaríkjunum er látinn, viku eftir að hann varð fyrir fólskulegri líkamsárás í skólanum. Pilturinn, Diego að nafni, varð fyrir árás tveggja pilta í Landmark-gagnfræðaskólanum þann 16. september.

Skólafélagar piltanna tóku árásina upp á myndband en á því má sjá þegar Diego eru veitt tvö þung högg í höfuðið. Seinna höggið varð til þess að hann datt aftur fyrir sig skall með hnakkann í steypustólpa. Diego lést af sárum sínum í fyrrakvöld.

Tveir piltar, báðir þrettán ára, hafa verið handteknir vegna málsins og eru þeir í haldi í unglingafangelsi í Riverside-sýslu. Þeir mega eiga von á ákæru vegna árásarinnar sem leiddi til dauða piltsins.

Mikil reiði ríkir vegna málsins, ekki síst meðal foreldra vegna þess hversu illa skólinn hefur staðið sig í eineltismálum sem upp hafa komið. Diego hafði verið lagður í einelti, meðal annars á samfélagsmiðlum.

KTLA ræddi við Crystal Rodriguez, nema við skólann, sem sagði að slagsmál væru daglegt brauð í skólanum en skólinn gerði ekkert til að stemma stigu við ofbeldinu.