Eigendur íbúðarhúss í Chelseahverfinu í New York hafa miklar áhyggjur af fyrirhuguðum byggingaframkvæmdum í nágrenni við húsið. Framkvæmdirnar myndu gera út af við útsýni íbúanna til Empire State byggingarinnar. En þar sem húsið er í hverfi auðmanna eru eigendur þess ekki með tóma vasa og gripu því til sinna ráða.

Þeir keyptu einfaldlega loftrýmið yfir húsi sem átti að byggja háan turn á sem hefði skert útsýnið til Empire State. Verðið var nú ekki í lægri kantinum eða 11 milljónir dollara. New York Times skýrir frá þessu.

Íbúarnir sem um ræðir búa í gömlu pakkhúsi en þar hafa meðal annarra búið Harrison Ford og Don Gummer eiginmaður Meryl Streep. Við hliðina á pakkhúsinu er mun lægri bygging en pakkhúsið er 12 hæðir. Til stóð að byggja háan turn ofan á lága húsið.

Íbúarnir í pakkhúsinu buðu því eiganda hins hússins að kaupa loftið fyrir ofan húsið svo hann gæti ekki byggt neitt þar. Tilboðið var upp á 11 milljónir dollara og var samþykkt.