Níu ára drengur hefur verið vistaður í ungmennafangelsi í St. Joseph County í Michigan í Bandaríkjunum síðan á mánudag. Hann er grunaður um að hafa skotið móður sína til bana með haglabyssu eftir að þau rifust.

ABC News skýrir frá þessu. Haft er eftir Reagan Martin, systur drengsins, að hann glími við andleg veikindi og hafi líklegast „snappað“ þegar hann skaut móður sína. Hún sagðist ekki vita hvernig honum tókst að ná í haglabyssuna sem var venjulega geymd í læstum skáp á heimili þeirra. Hún sagðist fullviss um að bróðir hennar hafi ekki ætlað að verða móður þeirra að bana heldur hræða hana.

Drengurinn var ættleiddur af fjölskyldunni fyrir þremur árum en hafði búið hjá henni síðan hann var mjög ungur.

Talsmaður lögreglunnar sagði að drengurinn hafi nú þegar undirgengist geðrannsókn.