Í nokkrum Twitterfærslum skammaði hann leyniþjónusturnar og sagði að þær „virðist vera einstaklega aðgerðarlausar og barnalegar“ hvað varðar Íran. Þessum skilaboðum hans virðist vera beint gegn Gina Haspel, yfirmanni hjá CIA, sem sagði fyrr í vikunni að „tæknilega séð“ virti Íran kjarnorkusamninginn.
Það kemur skýrt fram í skrifum Trump að öryggisráðgjafarnir, sem ríkisstjórn hans valdi til starfa, hafa rangt fyrir sér að hans mati og að hættan sem stafar að Íran fari vaxandi.
„Kannski ættu þau að setjast aftur á skólabekk.“
Sagði forsetinn.
Á þriðjudaginn kom Dan Coats, sem er æðsti yfirmaður nokkurra leyniþjónustustofnana, til dæmis CIA og NSA, fyrir þingnefnd í öldungadeildinni og fór yfir stöðu mála. Hann sagði að leyniþjónusturnar hafi ekki séð nein merki þess að Íran hafi brotið afvopnunarsamninginn en Trump hefur einmitt margoft haldið því fram að Íranar hafi gert það.
Hann fór einnig yfir mál tengdum öðrum ríkjum og ógnir gegn öryggi ríkisins. Hann ræddi meðal annars um Íslamska ríkið, Norður-Kóreu og Rússland sem og loftslagsbreytingarnar.
Í mörgum þessara mála fer mat leyniþjónustustofnananna þvert gegn mati Trump. Til dæmis telja leyniþjónusturnar ólíklegt að Norður-Kórea muni leggja kjarnorkuvopnaáætlun sína niður en Trump hefur látið hafa eftir sér að engin „kjarnorkuhætta“ stafi nú af Norður-Kóreu. Trump tjáði sig einnig um stöðuna í Afganistan, Íslamska ríkið og hið góða samband Bandaríkjanna og Norður-Kóreu. Hann lét þó alveg eiga sig að segja eitthvað um aðvaranir leyniþjónustustofnana um að Rússar og önnur ríki muni væntanlega reyna að hafa áhrif á bandarísk stjórnmál og blanda sér í forsetakosningarnar 2020.
