Það vakti mikla undrun á fimmtudag í síðustu viku þegar rafmagnið fór af stórum hluta bæjarins Herretslev við Nysted á Sjálandi í Danmörku. Ekki var að sjá að neitt hefði komið fyrir raflínurnar sem liggja til bæjarins. Starfsmenn rafmagnsveitunnar voru að sjálfsögðu sendir til bæjarins til að kanna málið og finna bilunina.

Þegar þeir skoðuðu rafmagnskassa í einni götu bæjarins sáu þeir að ótrúlega mikið af rafmagni fór í gegnum þennan kassa í hús í nágrenninu. Starfsmenn rafmagnsveitunnar renndi strax í grun að eitthvað ólöglegt væri í gangi í húsinu og var lögreglan því kölluð til.

Og viti menn, í húsinu fannst umfangsmikil kannabisræktun. Tveir menn á fertugsaldri voru handteknir í húsinu en þeir eru grunaðir um framleiðslu á fíkniefnum og þjófnað á rafmagni en ræktun á kannabis krefst mikils rafmagns.

Þegar lögreglan hafði lokið við að ganga frá uppskerunni stóðu eftir um 50 kg af hassi. Tvímenningarnir voru síðar úrskurðaðir í gæsluvarðhald vegna rannsóknar málsins.