Maðurinn réðst á föður sinn um kvöldmatarleytið á nóvemberdegi 2016. Hann hafði þá undirbúið morðið í þrjár vikur, meðal annars með því að leita að upplýsingum á internetinu um hvernig væri best að myrða fólk. Dómurinn komst að þeirri niðurstöðu að þetta sannaði að um morð af yfirlögðu ráði hafi verið að ræða.
Maðurinn hafði meðal annars leitað upplýsinga um hvernig íslamstrú tekur á morðum og fyrirgefningu vegna þeirra. Hann leitaði einnig að upplýsingum um hvernig er hægt að eitra fyrir fólki og um skotvopn og hnífa og hvernig væri best að stinga fólk til að valda því sem mestum skaða. TV2 skýrir frá þessu.
12 dögum fyrir morðið fór maðurinn í IKEA og keypti stóran hníf sem hann notaði síðan til að myrða föður sinn.
Fyrir dómi sagði maðurinn að hann hefði heyrt raddir sem skipuðu honum að drepa föður sinn. Að morðinu loknu fór hann út pall við húsið og hitti þar tvo nágranna. Þeir furðuðu sig á hegðun mannsins og að hann var blóðugur. Þeir hringdu því í lögregluna sem fann föðurinn látinn inni í íbúðinni. Ungi maðurinn var því handtekinn á vettvangi.
Maðurinn játaði fyrir dómi að hafa myrt föður sinn. Samband þeirra feðga var að sögn mjög erfitt.
Bæði saksóknari og verjandi mannsins kröfðust þess að hann yrði dæmdur til vistunar á geðdeild og varð dómstóllinn við því en maðurinn hefur meðal annars verið greindur með geðklofa.
Bæði saksóknari og verjandi eru sáttir við dóminn.
Í dómsorði kemur fram að maðurinn hafi komið til Noregs frá Afríkuríki þegar hann var þriggja ára. 2009 fór hann með til Afríku og stóð í þeirri trú að hann væri að fara í stutt frí þar. En fríið var ekki frí og ekki var um stutta ferð að ræða því hann kom ekki aftur til Noregs fyrr en 2012. Áður en hann fór til Afríku var hann í góðu jafnvægi og engin vandamál uppi en Afríkudvölin breytti honum mikið. Hann var meðal annars beittur miklu ofbeldi þar í kóranskóla sem hann var í.
