Þráinn Friðriksson, jarðfræðingur hjá Orkuveitu Reykjavíkur, segir líklegt að samspil gufuvirkni og mikillar úrkomu hafi komið af stað aurskriðu skammt frá Skíðaskálunum í Hveradölum um miðjan júlímánuð.

Þetta segir Þráinn í samtali við Morgunblaðið í dag.

Færsla Eldfjalla- og náttúruvárhóps Suðurlands á Facebook í gær vakti talsverða athygli en þar voru birtar myndir af miklum breytingum á svæðinu í sumar. „Ljóst er að öflugar gufusprengingar hafa orðið í einum hvernum sem hafa kastað leir og drullu upp í hlíðina fyrir ofan,“ sagði meðal annars í færslunni.

Þráinn hefur skoðað svæðið ásamt sérfræðingum ÍSOR, Veðurstofunnar og Eflu og segir hann við Morgunblaðið að gufuvirkni veiki bergið og jarðveginn. Það eigi síðan sinn þátt í því að jarðvegurinn umhverfis uppstreymisrásir gufunnar mettist með vatni.  Úrkoma eigi einnig þátt í að þyngja jarðvegstorfuna þannig að hún rofnar undan eigin þunga og skríði af stað niður brekkuna.

Í umfjölluninni kemur fram að skriðan hafi að líkindum rofið efsta jarðvegslagið ofan af gufuhvernum og komið af stað hvellsuðu fremur en að fyrirvaralaus gufusprenging hafi átt sér stað. Þá er bent á að mikil úrkoma hafi verið á suðvestanverðu landinu þá helgi sem skriðan varð.

Þráinn segir einnig að ekki sé hægt að útiloka að jarðhitavinnsla á Hellisheiði hafi orðið til þess að flýta því að skriðan átti sér stað. Telur hann að skriðan hefði farið af stað fyrr eða síðar þó engin vinnsla væri.

Nánar er fjallað um þetta mál í Morgunblaðinu í dag.