Sigríður Andersen sagði af sér embætti dómsmálaráðherra vegna dóms Mannréttindadómstóls Evrópu í vikunni. Dómar Landsréttar eru í uppnámi og málið hefur valdið Íslendingum niðurlægingu á alþjóðavísu. Við embættinu tók Þórdís Kolbrún Gylfadóttir Reykfjörð sem nú þegar gegnir glás af ráðherraembættum. Hér eru fimm einstaklingar sem hefðu getað tekið við lyklunum að dómsmálaráðuneytinu.

Brynjar Níelsson

Brynjar hefur langað í ráðherraembætti lengi og dómsmálaráðuneytið myndi henta honum vel. Reyndar var Arnfríður Einarsdóttir, eiginkona hans, einn af þeim dómurum sem Sigríður skipaði í Landsrétt. En hei, þetta er Ísland.

Áslaug Arna Sigurbjörnsdóttir

Allir varaformenn Sjálfstæðisflokksins hafa setið sem ráðherrar á einhverjum tímapunkti, nema Áslaug Arna. Áslaug gegndi stöðunni árin 2017 til 2018 og er nafn hennar stílbrot á listanum. Það verður að laga sem fyrst.

Birgir Ármannsson

Birgir hefur setið á Alþingi síðan árið 2003. Sama ár og Íraksstríðið hófst, Finding Nemo var frumsýnd og mannkynið lærði að temja eldinn. Aldrei hefur hann komið til greina í ráðherrastól sem er vandræðalegt fyrir bæði hann og flokkinn. Nú hefði verið lag að leiðrétta það.

Jón Gunnarsson

Jón fór í rokna fýlu þegar samgönguráðuneytið var tekið af honum. Brást hann við með því að ögra eftirmanni sínum, Sigurði Inga, með vegtollahugmynd sinni. Hægt hefði verið að friða Jón með dómsmálaráðuneytinu.

Vilhjálmur H. Vilhjálmsson

Vilhjálmur var maðurinn sem fór með Landsréttarmálið til Mannréttindadómstólsins og kom þar með upp um ráðherra. Ef ríkisstjórnin hefði það í sér að sýna iðrun væri tilvalin og táknræn yfirbót að bjóða Vilhjálmi sjálfum að taka að sér embættið sem utanþingsráðherra.