Það var í lagi að leigufélag í Óðinsvéum í Danmörku sagði konu upp leigu á íbúð í Vollsmose hverfinu vegna afbrots sem sonur hennar hafði verið dæmdur fyrir. Hæstiréttur Danmerkur kvað upp dóm í málinu á þriðjudaginn og sneri við dómi undirréttar og Eystri-landsréttar.

Þetta er ekki í fyrsta sinn sem hæstiréttur kveður upp dóm í máli er varðar leigjendur og afbrot barna þeirra. Samt sem áður er þetta mál fordæmisgefandi því í þessu máli var afbrotið ekki framið á umráðasvæði leigufélagsins eða nærri því.

Sonur konunnar réðist ásamt fleirum á lögreglumenn á bifreiðastæði í um 500 metra fjarlægð frá heimili þeirra mæðgina. Bifreiðastæðið er við hús sem leigufélag á og rekur en ekki sama leigufélag og mæðginin leigðu hjá.

Í dómi hæstaréttar kemur fram að afbrotið hafi verið framið í sama hverfi og mæðginin búa í og það skipti ekki máli þótt það hafi verið á umráðasvæði annars leigufélags. Dómurinn komst að þeirri niðurstöðu að afbrotið hafi verið til þess fallið að valda óöryggi meðal íbúa hverfisins og hafi verið svo gróft að leigufélagið hafi verið í fullum rétti að segja konunni upp sem leigjanda.