Ársreikningur Seltjarnarness fyrir árið 2025 var undirritaður af bæjarstjórn í dag. 

Minnihluti bæjarstjórnar segir ársreikninginn staðfesta alvarlega fjárhagsstöðu bæjarins. Halli A-hluta nam 477,5 milljónum króna, sem er talsvert meira en áætlanir gerðu ráð fyrir.

„Til að setja þessa tölu í samhengi er þessi halli þrefalt hærri en halli á rekstri Reykjavíkurborgar, sé hallanum deilt á íbúafjölda sveitarfélaganna.“

Minnihlutinn segir núverandi ástand ekki nýtt af nálinni. „Það fylgir tíu ára mynstri hallareksturs þar sem uppsafnað tap nemur nú 3,78 milljörðum króna. Skuldir á hvern íbúa hafa hækkað um 716 þúsund krónur á einu ári og standa nú í 1.873.000 krónum á hvert mannsbarn. Samhliða þessu hefur lausafjárstaðan versnað til muna og átti bærinn um áramót aðeins handbært fé sem dugir fyrir um þriggja daga rekstri.“

Í ljósi stöðunnar lagði Sigurþóra Bergsdóttir, oddviti Samfylkingar og óháðra fram svohljóðandi bókun við afgreiðslu ársreikningsins:

„Ársreikningur þessa árs staðfestir því miður þá dapurlegu þróun sem við höfum varað við árum saman. […] Í stað þess að auka ekki skuldir og fjárfesta í grunnþjónustu er bærinn fastur í viðvarandi hallarekstri sem hefur nú varað í tíu ár. Uppsafnaður halli síðustu tíu ára upp á 3,7 milljarða króna á A-hluta er ekki hægt að skýra með ófyrirséðum áföllum, þetta er mynstur sem því miður virðist ekki vera að breytast. […] Þessi staða er ávísun á skert þjónustustig og skort á fjárfestingargetu til framtíðar“.

Fulltrúar minnihlutans benda á að þessi fjárhagslega óstjórn bitni beint á innviðum og þjónustu. Sem dæmi er nefnd skert þjónusta við ungmenni, holóttar götur, ónógt viðhald skólahúsnæðis og staða félagsheimilisins sem stendur „tómt og í tætlum“, sem táknmynd hrörnunar.

Minnihlutinn segir að með óbreyttri stefnu stefni bærinn í fjárhagslegt óefni þar sem eina leiðin út verður annað hvort harkalegur niðurskurður á lögbundinni þjónustu eða verulegar skattahækkanir.

„Það er mat Samfylkingarinnar og óháðra að verið sé að veðsetja framtíðartækifæri unga fólksins á Seltjarnarnesi.“