Edda Björgvinsdóttir leikkona minnist Lárusar Björns Svavarssonar sem títt var kallaður Lalli Johns. Faðir hennar, Björgvin Magnússon, veitti Lalla skjól og menntun og varð verulega sorgmæddur þegar hann var sendur á Breiðuvík.

„Guð blessi elsku Lalla Johns. Yndislega góð sál og hrekklaus maður,“ segir Edda í færslu á samfélagsmiðlum.

Í gær var greint frá því að Lalli væri látinn, 74 ára að aldri. Lalli Johns varð frægur árið 2001 þegar út kom samnefnd heimildarmynd eftir Þorfinn Guðnason. Lalli ólst upp í fátækt í Reykjavík, var einn af Breiðavíkurdrengjunum svokölluðu sem urðu fyrir ofbeldi og vanrækslu og leiddist síðar út í drykkju, fíkniefnaneyslu og smáglæpi.

„Ég gleymi aldrei fallega vordeginum þegar ég gekk niður tröppurnar á vinnustað mínum Þjóðleikhúsinu, skömmu eftir að kvikmyndin um hann hafði verið frumsýnd. Lalli var á röltinu upp Hverfisgötuna og kom auga á mig og hrópaði: „Edda mín – veistu að ég er líka orðinn frægur!?“ svo hljóp hann yfir götuna og faðmaði mig innilega, eins og hann gerði alltaf þegar við hittumst,“ segir Edda.

Breiðavíkurvistin syrgði föður Eddu

Greinir hún frá því að faðir hennar, Björgvin Magnússon, hafi haldið utan um Lalla þegar hann var ungur og veitt honum skjól og menntun.

„Lalli var alltaf blíðan uppmáluð, brosandi gleðigjafi og góður við allt og alla,“ segir hún. Örlög hans hafi hins vegar valdið föður sínum sorg.

Sjá einnig:

Lalli Johns hætti að drekka eftir að Breiðavíkurmálið kom upp:„Þetta átti ekki að fara svona“

„Ég man eftir því að hafa upplifað pabba minn verulega sorgmæddan þegar hann frétti af því að eina úrræðið sem Reykjavíkurborg lét sér detta í hug fyrir Lalla, sem tilheyrði hópi barna sem ekki rákust vel í skólakerfinu, var vist á Breiðuvík. Án þess að nokkur vissi þá hver aðbúnaður barnanna á þeim stað raunverulega var á þessum tíma þá höfðu greinilega margir á tilfinningunni að þar væri ekki kærleiksrík umönnun. Úrræðaleysið var algjört hjá barnaverndaryfirvöldum þess tíma og eftirlitið enn minna,“ segir Edda.

Stimpluð vandræða börn

Greint var frá skelfilegum aðbúnaði drengjanna á Breiðuvík í DV og Kastljósi árið 2007 og þeim misþyrmingum og kynferðisofbeldi sem þeir urðu fyrir árin 1964 til 71. Síðar voru greiddar út bætur vegna málsins.

„Þegar ég var lítil kynntist ég mörgum „vandræðadrengjum“ sem kerfið hafði hafnað, drengjum sem pabbi minn hjálpaði og hélt utan um og stimpilinn „vandræða“ börn fengu þeir einfaldlega vegna þess að það brugðust nánast allir börnum í vanda á þessum tíma,“ segir Edda að lokum. „Það er sjónarsviptir af honum Lalla Johns, þessum sterka karakter og hans er sárt saknað. Það vantar fleiri kærleiksbúnt á þessa jörð.“