Talsverð ólga er í Hafnarfirði vegna ráðningar Dagnýjar Kristinsdóttur í starf skólastjóra Víðistaðaskóla á dögunum. Sjö umsækjendur voru um stöðuna, sem auglýst var þann 6. júní síðastliðinn, en þrír þeirra voru metnir hæfir til að gegna stöðunni. Að lokum þótti Dagný skara fram úr og var ráðin í stöðuna. Skákaði hún þar meðal annars Guðbjörgu Norðfjörð Elíasdóttir, aðstoðarskólastjóra Hraunavallaskóla og formanns Körfuknattleiksambands Íslands, sem nýtur mikilla vinsælda fyrir sín störf.
Fjarðarfréttir fjölluðu um málið en þar er rifjað upp að Dagný gegndi áður starfi skólastjóra Hvassaleitisskóla frá árinu 2020 en allt sauð upp úr innan skólans. Tæplega helmingur kennara skólans rituðu undir vantraustyfirlýsingu á hendur Dagnýju og kröfðust brotthvarfs hennar. Það endaði með því að Dagný sá sæng sína útbreidda og óskaði eftir að láta af störfum í desember 2022. Síðan þá hefur hún starfað sem deildarstjóri stigs í Setbergsskóla auk þess sem hún situr í bæjarstjórn Mosfellsbæjar fyrir lista Vina Mosfellsbæjar.
Athygli vekur að Dagný er náfrænka Valdimars Víðssonar, oddvita Framsóknarflokksins í Hafnarfirði og formanns bæjarráðs, en hann mun í byrjun árs 2025 taka við sem bæjarstjóri Hafnarfjarðar af Rósu Guðbjartsdóttur, oddvita Sjálfstæðisflokksins.
Vestfirski miðillinn Bæjarins besta fjallaði um skyldleika Valdimars og Dagnýjar þegar þau hlutu brautargengi í sveitastjórnarkosningunum árið 2022.
„Dagný og Valdimar voru í sama bekk í Grunnskóla Bolungavíkur og eru auk þess þremenningar, afkomendur Margrétar Guðfinnsdóttur frá Litlabæ og Sigurgeirs Sigurðssonar, skipstjóra frá Markeyri í Skötufirði. Til gamans má geta þess að verðandi bæjarstjóri í Garðabæ, Almar Guðmundsson er barnabarn Margrétar og Sigurgeirs og því náskyldur Valdimar og Dagnýju,“ sagði í umfjölluninni en þannig vill til að ritstjóri miðilsins er Kristinn H. Gunnarsson, fyrrum alþingismaður og faðir Dagnýjar.
Valdimar, verðandi bæjarstjóri Hafnarfjarðar, hefur mikla þekkingu á menntamálum en hann hefur starfað sem skólastjóri Öldutúnsskóla við góðan orðstír undanfarin ár.
Ráðning skólastjóra í Hafnarfirði fer þannig fram að sérstök þriggja manna nefnd metur umsækjendur. Þær sem eiga sæti í nefndinnu eru Þórunn Jóna Hauksdóttir, deildarstjóri grunnskólamála, Lind Einarsdóttir, mannauðsstjóri og Fanney Dóróthe Halldórsdóttir, sviðsstjóri mennta- og lýðheilsusviðs.
