Björn hefur verið afar gagnrýninn á greiðslumiðlunarfyrirtækið Rapyd að undanförnu en í pistli sínum í dag beinir hann spjótum sínum að Handknattleikssambandi Íslands (HSÍ).
Björn hefur bent á að forstjóri og aðaleigandi Rapyd hafi lýst eindregnum stuðningi við hernað Ísraela á Gasa og sagt að mannfall óbreyttra borgara skipti engu máli. Hefur þó nokkur fjöldi fyrirtækja hætt viðskiptum við Rapyd en Björn segir að HSÍ sé á öðru máli.
HSÍ og Rapyd gerðu fyrir skemmstu með sér samstarfssamning sem kveður meðal annars á um að tíu ungir handknattleiksleikmenn á aldrinum 16 til 21 árs verða styrktir um 700 þúsund krónur.
Rapyd og HSÍ gera samstarfssamning – Ætla að styrkja 10 efnilega leikmenn um 700 þúsund krónur
„Þessi tenging handboltans við fyrirtæki sem heldur á lofti þeim gildum sem Rapyd gerir var harðlega gagnrýnd en formaður HSÍ sagði að ekki kæmi til greina að segja samningnum upp. Að öðru leyti hefur stjórn HSÍ ekki svarað neinum fyrirspurnum um málið. Einfaldlega falið sig inni á skrifstofu og tekur ekki símann,“ segir Björn sem segist þekkja sjálfur dæmi um unga einstaklinga sem ákváðu að sækja ekki um styrkinn.
„Ég veit um nokkur ungmenni sem ekki sóttu um þessa styrki vegna þess að þau vildu ekki tengja sig við Rapyd. Þessir krakkar eru að færa fórnir samvisku sinnar vegna þó þau hefðu vel getað notað styrkinn og verið vel að honum komin. Þau hafa hins vegar ekki viljað opinbera afstöðu sína af ótta við að það geti skaðað framgang þeirra innan handboltahreyfingarinnar. Þau eru hrædd við stjórn HSÍ.“
Björn spyr hvort þetta sé eðlilegt ástand innan íþróttahreyfingarinnar.
„Að stjórn HSÍ skuli setja ungt afreksfólk í þessa stöðu? Að til að fá afreksstyrk þurfi þau tengja sig við fyrirtæki sem þau hafa megnustu andstyggð á? Hver eru skilaboðin til unga fólksins? Möguleikarnir eru tveir: Að HSÍ deili gildum Rapyd eða að stjórn HSÍ hafi engin æðri gildi en peninga, sama frá hverjum þeir koma.“
Allan pistil Björns má lesa hér.
