Það þótti grunsamlegt að mennirnir létust með svo skömmu millibili og ekki dró það úr grunsemdum margra að frá upphafi innrásar Rússa í Úkraínu hafa minnst 19 rússneskir olígarkar og háttsettir embættismenn látist við dularfullar kringumstæður. Sumir hafa „dottið“ út um glugga, aðrir eru sagðir hafa tekið eigið líf og einn er sagður hafa dottið niður tröppur.
Þessir óheppnu einstaklingar áttu það sameiginlegt að hafa gagnrýnt innrásina í Úkraínu og/eða Vladímír Pútín, Rússlandsforseta, opinberlega.
The Wall Street Journal skoðaði mál Antov og Bidenov betur nýlega og komst að einu og öðru tengdu málum þeirra.
Blaðið segir að samkvæmt upplýsingum frá lögreglunni þá hafi þeir báðir neytt töluvert mikils áfengis dagana áður en þeir létust. Þeir fóru saman til Indlands til að halda upp á 65 ára afmæli Antov. Á leiðinni frá Moskvu vöktu þeir athygli annarra í flugvélinni vegna þess hversu drukknir þeir voru.
Eftir komuna til Nýju Delí héldu þeir drykkjunni áfram og keyptu sér mikið af indversku rommi.
Natabar Mohanty, sem var bílstjóri þeirra í Nýju Delí, sagði að þeir hafi drukkið mjög mikið áfengi. Eitt sinn stövaði hann bílinn og sagði við leiðsögumann að þeir félagar myndu drekka sig í hel með þessu áframhaldi.
Vitni segja að Antov hafi eitt sinn verið svo drukkinn að það þurfti að bera hann inn í bíl þegar þeir félagar voru í skoðunarferð.
Krufning leiddi í ljós að Bidenov lést af völdum hjartaáfalls en Antov lést þegar hann hrapaði niður af svölunum.
Þrátt fyrir þessa niðurstöðu krufningarinnar hóf indverska lögreglan ítarlega rannsókn á andlátum þeirra félaga. Meðal annars var reynt að sviðsetja hvernig Antov datt niður af svölunum. Ástæðan er að orðrómur er á kreiki um að honum hafi verið hrint fram af þeim eða að hann hafi verið dáinn þegar honum var kastað fram af þeim.
Hann auðgaðist á pylsuframleiðslu og var einn umsvifamesti pylsugerðarmaðurinn í Rússlandi. Hann var einnig félagi í stjórnmálaflokki Pútíns og um hríð var hann í góðu sambandi við Pútín. Það breyttist skyndilega í júlí þegar Antov gagnrýni flugskeytaárásir á Kyiv og sagði þær hryðjuverk. Hann reyndi síðar að biðjast afsökunar á þessum ummælum sínum.
The Wall Street Journal segir að indverska lögreglan hafi ekki viljað vera með neinar getgátur um dauða mannanna né tengja málið við stríðið í Úkraínu eða við Pútín.
Lík þeirra voru brennd skömmu eftir að þeir létust og það hefur ýtt enn frekar undir orðróma og samsæriskenningar. Eða eins og indverski lögmaðurinn og stjórnmálamaðurinn Manish Tewari skrifaði á Twitter með tilvísun í hinn fræga leynilögreglumann Hercule Poirot sem var sköpunarverk breska rithöfundarins Agatha Christie: „Hercule Poirot sagði að brunnið lík skýri ekki frá leyndarmálum.“
