Allt frá því að Rússar réðust inn í Úkraínu hafa ríki á Vesturlöndum stutt við bakið á Úkraínu. Hafa þau látið fé af hendi rakna til landsins sem og mikið af vopnum. Norðmenn hafa verið rausnarlegir og í gær tilkynntu þeir um enn eina gjöfina til Úkraínu.

Þeir ætla að gefa 1,5 milljarða norskra króna, sem svarar til um 21,5 milljarða íslenskra króna, til Úkraínu og verður fénu varið til kaupa á vopnum og öðrum búnaði fyrir úkraínska herinn.

Bjørn Arild Gram, varnarmálaráðherra, tilkynnti þetta í gær og sagði að peningarnir verði gefnir til International Fund for Ukraine sem Bretar sjá um. Með þessu framlagi verða Norðmenn stærstu stuðningsaðilar sjóðsins ásamt Bretum.

Gram sagði að peningunum verði varið til kaupa á vopnum og öðrum búnaði fyrir úkraínska herinn en nú verði fyrirkomulagið öðruvísi en áður. Fram að þessu hafa stuðningsríki Úkraínu aðallega gefið landinu vopn úr eigin vopnageymslum en nú hafa Úkraínumenn meiri þörf fyrir að kaupa vopn beint af framleiðendum til að geta mætt þörfum sínum.

Gram sagði einnig að Norðmenn muni áfram aðstoða við þjálfun og menntun úkraínskra hermanna sem sé ekki síður mikilvægt en bein fjárframlög.