Skömmu fyrir klukkan 20 í gærkvöldi kom maður vopnaður eggvopni inn í söluturn í Árbæ. Hann ógnaði starfsstúlku en hljóp tómhentur á brott þegar viðskiptavinir komu að. Á níunda tímanum í gærkvöldi hafði lögreglan afskipti af þremur mönnum í Hafnarfirði vegna gruns brot á sóttvarnarlögum en þeir áttu að vera í einangrun vegna COVID-19 smits. Einn þeirra var handtekinn, grunaður um hótanir. Hann var vistaður í fangageymslu vegna rannsóknar málsins.

Á sjöunda tímanum í gær hafði lögreglan afskipti af manni sem er grunaður um þjófnað úr verslun á Granda. Hann var með matvörur að verðmæti rúmlega 26.000 króna. Hann sagðist ekki hafa átt peninga fyrir vörunum.

Á sjöunda tímanum í gær var tilkynnt um líkamsárás í Hafnarfirði. Meintur árásarmaður var handtekinn og vistaður í fangageymslu. Árásarþolinn var fluttur á slysadeild en hann var með sár á höfði.

Í Garðabæ var tilkynnt um tvo unga menn sem grýttu bifreið á níunda tímanum í gærkvöldi. Þeir brutu meðal annars hliðarrúðu og spegil. Þeir fundust ekki.

Á tólfta tímanum í gærkvöldi var ökumaður handtekinn í Hafnarfirði eftir að hann lenti í umferðaróhappi. Hann er grunaður um ölvun við akstur. Grunur leikur á að hann hafi ekið á grindverk skömmu áður en hann lenti í umferðaróhappinu. Hann var vistaður í fangageymslu.

Þrír ökumenn voru handteknir í nótt, grunaðir um að vera undir áhrifum fíkniefna.