Á Instagram-síðu stuðningsfólks nýju stjórnarskrárinnar, @nyjastjornarskrain, birtist í dag færsla er varðaði andleg veikindi. Þar mátti sjá mynd af tölustafnum 39, sem stendur fyrir fjölda sjálfsvíga sem átti sér stað hér á landi árið 2019. Myndin var notuð í auglýsingaherferð Geðhjálpar, þar sem að samfélagið er hvatt til að setja geðheilsu í forgang. @nyjastjornarskrain tók undir það, en hvatti til þess að fólk myndi bæði skrifa undir hjá Geðhjálp og á undirskriftalista fyrir Nýja stjórnarskránna.
„Við skorum á stjórnvöld og samfélagið allt að setja geðheilsu í forgang með því að lögfesta nýju stjórnarskránna sem tryggir að allir eiga rétt til að njóta andlegrar og líkamlegrar að hæsta marki sem unnt er. Alvöru kerfisbreytingu TAKK! Klárum verkið og skrifum undir.“
Færslan hefur nú verið tekin út og afsökunarbeiðni verið birt á síðunni. Fjöldi fólks hafði gagnrýnt færsluna, fyrir það að blanda þessum tveimur málaflokkum saman. Sú gagnrýni var sérstaklega áberandi á Twitter, en þar sköpuðust miklar umræður. Margir voru ansi harðorðir og fullyrtu að færslan væri siðlaus eða ógeðsleg.
„Þetta er svo siðlaust að það nær engri átt.“
„Ride-a wavei geðhjálpar til að koma stjórnarskránni á framfæri? Þetta er eiginlega bara frekar sárt að sjá.“
„Þannig að ef ég er ekki hlynntur því að tillögur stjórnlagaráðs frá 27. júlí 2011 komi í stað stjórnarskrárinnar þá er ég…á móti því að vinna gegn sjálfsvígum?“
„Þetta er mjög ósmekklegt.“
Davíð Þorláksson, forstöðumaður hjá Samtökum Atvinnulífsins var einn þeirra sem gagnrýndi færslu @nyjastjornarskrain á Twitter. Honum sagðist vera mjög annt um geðheilbrigðismál og sagðist glaður styðja nýja stjórnarskrá myndi hún leiða til færri sjálfsvíga, það væri aftur á móti ekki raunin.
Ég átti góðan vin sem féll fyrir eigin hendi. Mér er mjög annt um geðheilbrigðismál og var búinn að skrifa undir áskorun Geðhjálpar. Ég myndi styðja nýja stjórnarskrá ef hún myndi leiða til færri sjálfsvíga, en það myndi hún augljóslega ekki gera. Þetta er ósmekklegt lýðskrum. https://t.co/CkzPb2yAlw
— Davíð Þorláksson (@davidthorlaks) October 15, 2020
Fjöldi fólks lækaði og/eða deildi tísti Davíðs. Þar á meðal Áslaug Arna Sigurbjörnsdóttir, dómsmálaráðherra. Hún sagðist taka undir orð hans.
Tek heilshugar undir með @davidthorlaks. https://t.co/ujc5wkG7tY
— Áslaug Arna Sigurbjörnsdóttir (@aslaugarna) October 15, 2020
Halldór Auðar Svansson, fyrrverandi borgarfulltrúi Pírata og stjórnarmaður í Geðhjálp, benti á þegar að færslan var tekin út. Honum fannst fólk vera að fara fram úr sér og sagðist ekki standa á sama að Geðhjálpar-„brandið“ væri notað á þennan hátt.
Mér sýnist þetta vera farið af Instagram-síðunni þeirra enda eins gott – sem stjórnarmaður í Geðhjálp stendur mér ekki alveg á sama um að þetta brand sé nýtt á þennan hátt. Fólk aðeins að fara fram úr sér. Ætti að vera fullfært um að há þessa baráttu á sínum eigin forsendum.
— Halldór Auðar Svansson (@tharfagreinir) October 15, 2020
Líkt og áður segir hefur afsökunarbeiðni birst á síðu @nyjastjornarskrain. Þar sagðist sá einstaklingur sem að setti færsluna inn glíma við andleg veikindi og því væri málaflokkurinn sér sérstaklega hugleikinn. Beðist var afsökunar á því að þessi tvö átök væru bendluð saman.
„Hugsunin með þessu var aðeins að vekja athygli á því að sú kerfisbreyting sem Geðhjálp er að vinna, samrýmist svo vel þeirri breytingu sem við erum að kalla eftir.
Ég sem sett færsluna inn er sjálf með geðhvarfasýki og brenn því sérstaklega fyrir þessum málaflokki. Ég biðst fyrirgefningar á því að hafa bendlað saman þessi tvö átök. Ég vil ekki særa neinn og mund vanda mig meira í framtíðinni!“