Ragga Nagli er klínískur heilsusálfræðingur og einkaþjálfari. Á Facebook heldur hún úti vinsælli síðu þar sem hún birtir reglulega pistla um hreyfingu, mataræði og fleira. Í þessum fjallar hún um nokkur næringaráð fyrir þá sem velja að stunda æfingar að morgni til.
Margir hanga á hurðahúninum þegar musteri líkamans opna rennihurðina klukkan sex núll núll að morgni.
Inn streyma hermenn morgunsins, víkingar og valkyrjur fullar af eldmóði að safna meira siggi í lófa og þófa.
En hvað skal snæða fyrir slíkar snemmæfingar?
Það er ekki allra að hoppa og hamast með magann fullan af hafragraut.
Fæstir nenna heldur að munda sleif og spón hlóðirnar fyrir dögun að kokka upp haframjölið.
Sumir fá sjóriðu að tæta upp stál og spæna spretti án þess að hafa eitthvað eldsneyti í tanknum og dúndra í sig hálfum banana.
Öðrum líður fínt að æfa á galtómri görninni.
En eru fullir angistar um að spæna upp amínósýrur úr vöðvunum sem kosta jú blóðsúthellingar, rassasvita og jafnvel örfá tár að byggja upp.
Hér eru nokkur ráð fyrir æfingameli sem fara á fætur á undan blaðberunum og vilja hámarka árangur sinn.
?Drekka 5-15 g BCAA amínósýrum eða Pre-workout drykk 15-20 mínútum fyrir æfingu. Amínósýrurnar koma af stað prótínmyndun í vöðvum og nýtast sem eldsneyti.
Rannsóknir sýna að inntaka BCAA seinkar þreytu í vöðvum.
?Borða vel af kolvetnum, prótíni og fitu í kvöldmat. Margir telja að þeir muni ekki standa sig eins vel ef þeir dúndra ekki í sig kolvetnum rétt fyrir æfingu, en vel samsett máltíð kvöldið fyrir veitir fínar birgðir af bensíni næsta morgun.
Það getur verið gott að seinka kvöldmatnum örlítið til að það líði styttra frá máltíð til æfingar.
?Fóðraðu hungraða vöðvana eftir æfingu með prótíni og kolvetnum. Sumir eru eins og vannærðir fuglsungar strax eftir æfingu, en aðrir finna ekki fyrir hungri fyrr en 2-3 tímum seinna. Finndu hvað virkar fyrir þig.
Hafðu í huga að það er engin rétt eða röng leið þegar kemur að því að næra sig fyrir og eftir æfingu.
Finndu bara leiðina sem hentar þér og þú getur viðhaldið.
