Fékk far með Landhelgisgæslunni upp á Úlfarsfell til að taka þátt í einstökum viðburði á glæsilegum ferli sínum
„Það var alveg gífurlegur stæll á þessu,“ segir stórsöngvarinn Ragnar Bjarnason (82) sem var meðal þeirra listamanna sem komu fram í hlíðum Úlfarsfells í Mosfellsbæ á miðvikudagskvöld þar sem mikið var um dýrðir í skemmtigöngu Ferðafélags Íslands. Tilefnið var ærið enda Reynir Traustason, fyrrverandi ritstjóri DV, að fara sína þúsundustu ferð upp Úlfarsfellið. Auk Ragga komu fram Stuðmenn, Valdimar og Bjartmar Guðlaugsson. En erfitt var fyrir göngugarpana að toppa innkomu Ragga Bjarna á hátíðarhöldin enda var honum flogið upp í þyrlu Landhelgisgæslunnar.
„Þetta er stærsta þyrla sem ég hef séð,“ segir Raggi léttur í samtali við DV en á löngum og glæsilegum ferli hefur hann aldrei komið fram á fjalli áður. Þó var þetta ekki í fyrsta skipti sem hann er ferjaður á tónleikastað með þyrlu, en hann fór með lítilli þyrlu frá Bakka yfir til Vestmannaeyja á Þjóðhátíð. „En aldrei svona græju. Þetta var alveg stórkostlegt.“
Raggi segir að það hafi verið ógleymanlegt að sjá mannfjöldann samankominn á fjallinu úr lofti. Viðtökurnar og andinn í mannskapnum lét hann heldur ekki ósnortinn.
„Þetta var yndislegt, fólkið tók mér svo vel. Það var svo mikil gleði og við urðum þarna öll eins og ein stór fjölskylda. Ég vil nýta tækifærið og færa flugmönnum Landhelgisgæslunnar, sem dekruðu við mig, og öllum sem að þessum viðburði komu hjartans þakkir fyrir mig. Þetta var alveg einstakt.“
