Stór áfangi í sögu skólans – Rapparinn Ilovemakonnen hlakkar til að koma til Íslands
Í næstu viku fagnar Menntaskólinn í Kópavogi (MK) einum stærsta áfanga í sögu sinni. Stjórn nemendafélags skólans hefur í samstarfi við skólastjórn komið því til leiðar að rappstjarnan Ilovemakonnen komi til að spila á lokaballi skólans, hinn 4. maí næstkomandi. Félagslífið í MK hefur notið meðbyrjar allt þetta skólaár en nær nú hápunkti sínum með komu rapparans.
Ilovemakonnen er bandarískur tónlistarmaður frá fylkinu Georgiu og er meðal þeirra stærstu á sínu sviði í heiminum. Hann skaust upp á stjörnuhimininn árið 2014 með laginu Tuesday og hefur verið þar síðan. Lagið framleiddi hann með starfsbróður sínum Drake, sem er einn allra vinsælasti tónlistarmaður heims í dag, og hefur það hlotið tæplega 150 milljónir í áhorf á YouTube.
Blaðamaður DV spjallaði í vikunni við fjóra stráka úr MK sem hafa staðið fyrir skipulagningu ballsins. Það eru þeir Hrafn Ágúst Björnsson, Guðlaugur Þór Ingvason, Andri Sveinn Ingólfsson og Samúel Patrik O’Neill. Allir eru þeir í stjórn nemendafélags MK að Samúel undanskildum, sem er formaður skemmtinefndar skólans.
Ilovemakonnen hefur trúlega aldrei komið fram á eins fámennum viðburði og á lokaballi MK.
„Fyrir skömmu spilaði hann fyrir 150 þúsund manns á tónlistarhátíðinni Ultra í Miami,“ segir Guðlaugur og bætir því við að þetta sé nýlunda fyrir hann. „Hann hefur sjálfur mikinn áhuga á að heimsækja Ísland,“ segir Samúel. „Hann lendir nokkrum dögum fyrr og ætlar að skoða landið á eigin vegum fram að ballinu,“ skýtur Hrafn síðan inn í.
Er það flókið ferli að flytja inn svona frægan tónlistarmann?
„Þetta er alltaf töluverð fyrirhöfn að finna fólk til að koma fram en sérstaklega núna, þar sem þetta er mjög stórt stökk. Það er ákveðin áhætta sem fylgir því að ráða svona dýran tónlistarmann þannig að það var svolítið erfitt að sannfæra skólastjórnina – en það hafðist þó að lokum,“ segja strákarnir.
Þeir hafa staðið í stórræðum við skipulagningu ballsins frá því í janúar. Fyrst útbjuggu þeir lista yfir alla listamenn sem þeim leist vel á og hófu því næst að setja sig í samband við þá, einn af öðrum.
Þeir Guðlaugur, Samúel, Andri og Hrafn höfðu sérstakan áhuga á að fá Ilovemakonnen til landsins og voru lánsamir að sá áhugi skyldi vera gagnkvæmur. Valið féll vel í kramið meðal flestra nemenda skólans sem bíða þess nú með óþreyju að ljúka skólaárinu með reisn á einum merkasta viðburði í sögu MK.
