Níutíu og átta ára gömul kona flutti á hjúkrunarheimili til þess að sinna áttræðum syni sínum vegna þess að henni þótti hann þurfa meiri umönnun og stuðning.

Ada Keating ákvað að flytja á hjúkrunarheimilið Moss View care í Liverpool þar sem sonur hennar, Tom, hefur dvalið frá árinu 2016. Tom er ókvæntur og hafa mæðginin því eytt miklum tíma saman í gegnum ævina.

„Ég fer og segi góða nótt við hann á hverjum degi og mæti svo á morgnana til þess að bjóða honum góðan daginn og segi honum að ég komi niður í morgunmatinn. Maður hættir aldrei að vera mamma,“ segir Ada í viðtali við Metro.

Tom er ánægður með þjónustuna sem hann fær á heimilinu og er sérstaklega glaður nú þegar hann getur séð mömmu sína á hverjum degi.

„Hún hugsar mjög vel um mig. Stundum segir hún mér að haga mér vel,“ segir Tom.

Aðstandendur mæðginanna eru mjög ánægð að þau séu saman á hjúkrunarheimilinu.

„Það er ekki hægt að slíta þau í sundur og það er mjög mikil ró fyrir okkur að vita að hugsað sé um þau allan sólarhringinn,“ segir Debi, barnabarn Ada.

Philip Daniels, framkvæmdarstjóri hjúkrunarheimilisins, segir að það sé mjög hjartnæmt að sjá hversu náin Tom og Ada eru.

„Það er mjög óalgengt að móðir og barn séu saman á hjúkrunarheimili og við viljum gera tíma þeirra hér saman eins einstakan og hægt er, samband þeirra er órjúfanlegt,“ segir Philip.